బృహస్పతికవచమ్
శ్రీగణేశాయ నమః ।
అస్య శ్రీబృహస్పతికవచస్తోత్రమన్త్రస్య ఈశ్వర ఋషిః,
అనుష్టుప్ ఛన్దః, గురుర్దేవతా, గం బీజం, శ్రీశక్తిః,
క్లీం కీలకం, గురుప్రీత్యర్థం జపే వినియోగః ।
అభీష్టఫలదం దేవం సర్వజ్ఞం సురపూజితమ్ ।
అక్షమాలాధరం శాన్తం ప్రణమామి బృహస్పతిమ్ ॥ ౧॥
బృహస్పతిః శిరః పాతు లలాటం పాతు మే గురుః ।
కర్ణౌ సురగురుః పాతు నేత్రే మేఽభీష్టదాయకః ॥ ౨॥
జిహ్వాం పాతు సురాచార్యో నాసాం మే వేదపారగః ।
ముఖం మే పాతు సర్వజ్ఞో కణ్ఠం మే దేవతాగురుః ॥ ౩॥
భుజావాఙ్గిరసః పాతు కరౌ పాతు శుభప్రదః ।
స్తనౌ మే పాతు వాగీశః కుక్షిం మే శుభలక్షణః ॥ ౪॥
నాభిం దేవగురుః పాతు మధ్యం పాతు సుఖప్రదః ।
కటిం పాతు జగద్వన్ద్య ఊరూ మే పాతు వాక్పతిః ॥ ౫॥
జానుజఙ్ఘే సురాచార్యో పాదౌ విశ్వాత్మకస్తథా ।
అన్యాని యాని చాఙ్గాని రక్షేన్మే సర్వతో గురుః ॥ ౬॥
ఇత్యేతత్కవచం దివ్యం త్రిసన్ధ్యం యః పఠేన్నరః ।
సర్వాన్కామానవాప్నోతి సర్వత్ర విజయీ భవేత్ ॥ ౭॥
ఇతి శ్రీబ్రహ్మయామలోక్తం బృహస్పతికవచం సమ్పూర్ణమ్
Note: HTML is not translated!